ກ່ຽວກັບພວກເຮົາ
ກ່ຽວກັບພວກເຮົາ
STP Development Sole ແມ່ນທີມງານຊ່ຽວຊານດ້ານການຈັດສັນຍົກຍ້າຍ, ການຟື້ນຟູຊີວິດການເປັນຢູ່ ແລະ ການພັດທະນາຊຸມຊົນ ຢູ່ ສປປ ລາວ. ພວກເຮົາບໍ່ຢຸດຢູ່ພຽງແຕ່ການຂຽນແຜນ ແຕ່ຢູ່ຮ່ວມຈັດຕັ້ງປະຕິບັດກັບເຈົ້າຂອງໂຄງການ, ອົງການປົກຄອງທ້ອງຖິ່ນ ແລະ ຜູ້ໄດ້ຮັບຜົນກະທົບ ຕັ້ງແຕ່ການສຳຫຼວດຄັ້ງທຳອິດ ຈົນເຖິງວັນທີ່ຊຸມຊົນຕັ້ງຖິ່ນຖານໝັ້ນຄົງ ຢູ່ບ້ານຈັດສັນໃໝ່. ທຸກຂັ້ນຕອນ ແມ່ນດຳເນີນໃຫ້ສອດຄ່ອງກັບກົດໝາຍ ແລະ ນິຕິກຳ ຂອງ ສປປ ລາວ ແລະ ມາດຕະຖານການປະຕິບັດງານ ຂອງ IFC (IFC Performance Standards).
ການກຳນົດເຂດນ້ຳຖ້ວມອ່າງເກັບນ້ຳ ແລະ ການຕິດຕັ້ງຫຼັກໝາຍເຂດຖາວອນ
ພວກເຮົາສຳຫຼວດພູມສັນຖານ ແລະ ກຳນົດແນວເຂດນ້ຳຖ້ວມ ຕາມລະດັບນ້ຳກັກເກັບສູງສຸດຂອງອ່າງ, ຈາກນັ້ນຕິດຕັ້ງຫຼັກໝາຍເຂດຖາວອນ ພ້ອມບັນທຶກຄ່າພິກັດ ແລະ ສ້າງແຜນທີ່. ແນວເຂດທີ່ຊັດເຈນ ແລະ ໄດ້ຮັບການຢັ້ງຢືນຮ່ວມກັບອົງການປົກຄອງທ້ອງຖິ່ນ ແລະ ຊຸມຊົນ ແມ່ນພື້ນຖານຂອງການສຳຫຼວດຊັບສິນ ແລະ ການທົດແທນ ທີ່ຖືກຕ້ອງ, ໂປ່ງໃສ ແລະ ກວດສອບໄດ້.
ການສຳຫຼວດເກັບກຳຂໍ້ມູນປະຊາກອນ, ເສດຖະກິດ-ສັງຄົມ ແລະ ຊັບສິນ ທີ່ໄດ້ຮັບຜົນກະທົບຈາກໂຄງການ
ພວກເຮົາລົງສຳພາດທຸກຄົວເຮືອນທີ່ໄດ້ຮັບຜົນກະທົບ, ສຳຫຼວດສະພາບເສດຖະກິດ-ສັງຄົມ ແລະ ຂຶ້ນບັນຊີຊັບສິນຢ່າງລະອຽດ: ທີ່ດິນ, ເຮືອນ, ສິ່ງປຸກສ້າງ, ຕົ້ນໄມ້ ແລະ ພືດຜົນລະປູກ. ຜົນການສຳຫຼວດ ແມ່ນໃຫ້ເຈົ້າຂອງຊັບສິນ (ທັງຜົວ ແລະ ເມຍ) ແລະ ອົງການປົກຄອງບ້ານ ກວດກາ ແລະ ເຊັນຢັ້ງຢືນຮ່ວມກັນ, ເພື່ອເປັນພື້ນຖານໃນການຮັບຮອງວັນກຳນົດສິດ (Cut-off Date) ແລະ ເປັນຂໍ້ມູນພື້ນຖານ ສຳລັບການທົດແທນ ແລະ ການຕິດຕາມປະເມີນຜົນ.
ການທົດແທນຄ່າເສຍຫາຍ
ພວກເຮົາສ້າງຕາຕະລາງສິດຜູ້ໄດ້ຮັບຜົນກະທົບ (Entitlement Matrix) ແລະ ຄິດໄລ່ມູນຄ່າທົດແທນ ຕາມຫຼັກການມູນຄ່າທົດແທນເຕັມ ແລະ ຫົວໜ່ວຍລາຄາ ທີ່ອົງການປົກຄອງແຂວງຮັບຮອງ. ເຈົ້າຂອງຊັບສິນ ໄດ້ຮັບການຊີ້ແຈງ ແລະ ເຊັນຮັບຮອງມູນຄ່າຂອງຕົນ ກ່ອນການຈ່າຍ. ການຈ່າຍຄ່າທົດແທນ ດຳເນີນຢ່າງໂປ່ງໃສ ແລະ ສຳເລັດກ່ອນການນຳໃຊ້ທີ່ດິນ, ພ້ອມດ້ວຍກົນໄກແກ້ໄຂຄຳຮ້ອງທຸກ ທີ່ປະຊາຊົນເຂົ້າເຖິງໄດ້ງ່າຍ.
ການຍົກຍ້າຍຈັດສັນ
ພວກເຮົາຮ່ວມກັບຊຸມຊົນ ເລືອກສະຖານທີ່ຕັ້ງບ້ານຈັດສັນໃໝ່, ວາງຜັງບ້ານ, ແບບເຮືອນ ແລະ ພື້ນຖານໂຄງລ່າງ ເຊັ່ນ: ເສັ້ນທາງ, ໄຟຟ້າ, ນ້ຳປະປາ, ໂຮງຮຽນ, ສຸກສາລາ ແລະ ວັດ. ການຍົກຍ້າຍ ແມ່ນກະກຽມເປັນແຕ່ລະໄລຍະ, ເຄົາລົບພິທີກຳ ແລະ ຮີດຄອງປະເພນີ ຂອງແຕ່ລະຊົນເຜົ່າ ແລະ ມີການຊ່ວຍເຫຼືອພິເສດແກ່ກຸ່ມບອບບາງ ເພື່ອໃຫ້ທຸກຄົວເຮືອນຍ້າຍເຂົ້າບ້ານໃໝ່ ຢ່າງປອດໄພ ແລະ ເປັນລະບຽບ.
ການຟື້ນຟູຊີວິດການເປັນຢູ່
ການຈັດສັນຍົກຍ້າຍ ຈະຖືວ່າສຳເລັດ ກໍຕໍ່ເມື່ອລາຍຮັບ ແລະ ຊີວິດການເປັນຢູ່ ຂອງຄົວເຮືອນ ກັບຄືນມາເທົ່າເດີມ ຫຼື ດີກວ່າເດີມ. ພວກເຮົາສ້າງ ແລະ ຈັດຕັ້ງປະຕິບັດແຜນຟື້ນຟູຊີວິດການເປັນຢູ່ (LRP) ຕາມຄວາມຕ້ອງການຂອງແຕ່ລະຄົວເຮືອນ: ການພັດທະນາດິນທຳການຜະລິດ, ການປູກຝັງ, ການລ້ຽງສັດ, ການຝຶກອົບຮົມວິຊາຊີບ ແລະ ທຸລະກິດຂະໜາດນ້ອຍ. ພວກເຮົາຕິດຕາມລາຍຮັບ-ລາຍຈ່າຍ ຂອງຄົວເຮືອນເປັນປະຈຳ ທຽບກັບຂໍ້ມູນພື້ນຖານ ແລະ ເສັ້ນຄວາມທຸກຍາກແຫ່ງຊາດ ເພື່ອປັບການຊ່ວຍເຫຼືອໃຫ້ທັນເວລາ.
ການພັດທະນາຊຸມຊົນ
ບ້ານຈັດສັນໃໝ່ ຕ້ອງເປັນຊຸມຊົນທີ່ເຂັ້ມແຂງ ບໍ່ແມ່ນພຽງແຕ່ເຮືອນຫຼັງໃໝ່. ພວກເຮົາສະໜັບສະໜູນວຽກງານສຶກສາ, ສາທາລະນະສຸກ, ນ້ຳສະອາດ ແລະ ສຸຂະອະນາໄມ, ການປົກປັກຮັກສາວັດທະນະທຳ, ພ້ອມທັງສ້າງຄວາມເຂັ້ມແຂງ ໃຫ້ອົງການຈັດຕັ້ງບ້ານ ແລະ ກຸ່ມຜະລິດ ເພື່ອໃຫ້ຊຸມຊົນຄຸ້ມຄອງ ແລະ ບຳລຸງຮັກສາສິ່ງອຳນວຍຄວາມສະດວກ ດ້ວຍຕົນເອງໃນໄລຍະຍາວ. ແມ່ຍິງ, ກຸ່ມຊົນເຜົ່າ ແລະ ກຸ່ມບອບບາງ ມີສ່ວນຮ່ວມຢ່າງແທ້ຈິງ ໃນທຸກກິດຈະກຳ.
ກຳລັງວາງແຜນໂຄງການ ທີ່ຕ້ອງຍົກຍ້າຍປະຊາຊົນ ຫຼື ນຳໃຊ້ທີ່ດິນ ຂອງປະຊາຊົນ ບໍ?
ບອກພວກເຮົາ ກ່ຽວກັບປະເພດໂຄງການ, ສະຖານທີ່ ແລະ ຂັ້ນຕອນ ທີ່ໂຄງການດຳເນີນຢູ່. ພວກເຮົາ ຈະຕອບກັບ ພ້ອມລາຍການ ການສຳຫຼວດ, ແຜນ ແລະ ການອະນຸມັດ ທີ່ໂຄງການ ຄວນມີ.