ວັນກຳນົດສິດ (Cut-off Date) ແມ່ນຫຍັງ?

ວັນກຳນົດສິດ (ວັນຂຶ້ນທະບຽນສິດ ຂອງຜູ້ໄດ້ຮັບຜົນກະທົບ; Cut-off Date)

ໝາຍເຖິງ ວັນທີ່ ຄະນະກຳມະການຄຸ້ມຄອງການຈັດສັນຍົກຍ້າຍ ແລະ ຟື້ນຟູຊີວິດການເປັນຢູ່ ຂັ້ນແຂວງ ຫຼື ອົງການທີ່ກ່ຽວຂ້ອງ ຮັບຮອງ ການຂຶ້ນທະບຽນ ປະຊາກອນ, ທີ່ດິນ ແລະ ຊັບສິນ ໃນຂອບເຂດໂຄງການ ທີ່ອາດໄດ້ຮັບຜົນກະທົບ ຈາກການພັດທະນາໂຄງການ. ທຸກການເຄື່ອນໄຫວ ທີ່ເກີດຂຶ້ນ ພາຍຫຼັງວັນດັ່ງກ່າວ (ເຊັ່ນ: ການປຸກສ້າງໃໝ່, ການປູກຝັງໃໝ່ ຫຼື ການຍ້າຍເຂົ້າມາຢູ່ໃໝ່) ຈະບໍ່ໄດ້ຮັບການທົດແທນ ຈາກເຈົ້າຂອງໂຄງການ, ຍົກເວັ້ນ ກໍລະນີ ແຜນການທົດແທນ ບໍ່ໄດ້ຈັດຕັ້ງປະຕິບັດ ພາຍໃນ 12 ເດືອນ ນັບແຕ່ວັນກຳນົດສິດ ເຊິ່ງຕ້ອງປະເມີນມູນຄ່າທົດແທນຄືນໃໝ່. (ດຳລັດ ເລກທີ 84/ລບ, ລົງວັນທີ 5 ເມສາ 2016, ມາດຕາ 8 ຂໍ້ 10 ແລະ 12; ກົດໝາຍວ່າດ້ວຍການຈັດສັນພູມລຳເນົາ ແລະ ອາຊີບ ເລກທີ 45/ສພຊ, ລົງວັນທີ 15 ມິຖຸນາ 2018, ມາດຕາ 22 ຂໍ້ 12 ແລະ 13.)

ຜົນປະໂຫຍດ ໃນໄລຍະເສຍໂອກາດ

ໝາຍເຖິງ ຜົນຕອບແທນ ຈາກການດຳເນີນກິດຈະການໃດໜຶ່ງ ເຊັ່ນ ທຸລະກິດ ທີ່ຜູ້ໄດ້ຮັບຜົນກະທົບ ຈະໄດ້ຮັບການທົດແທນ ຈາກໂຄງການຈັດສັນພູມລຳເນົາ ແລະ ອາຊີບ ເປັນໄລຍະເວລາ 3 ປີ. (ກົດໝາຍວ່າດ້ວຍການຈັດສັນພູມລຳເນົາ ແລະ ອາຊີບ ເລກທີ 45/ສພຊ, ມາດຕາ 3 ຂໍ້ 13.)

ໄລຍະຂ້າມຜ່ານ

ໝາຍເຖິງ ໄລຍະຟື້ນຟູຊີວິດການເປັນຢູ່ ຂອງຜູ້ໄດ້ຮັບຜົນກະທົບ ພາຍໃນ 3 ຫາ 5 ປີ ນັບແຕ່ວັນຍົກຍ້າຍ. (ກົດໝາຍວ່າດ້ວຍການຈັດສັນພູມລຳເນົາ ແລະ ອາຊີບ ເລກທີ 45/ສພຊ, ມາດຕາ 3 ຂໍ້ 15.)